අබිරහස් ලෙස පිළිස්සුණු සිරුරක් නත්තල් දා හමු වෙයි

 

හබරණ පොළොන්නරුව ප්‍රධාන මාර්ගයේ අබිරහස් සිදුවීමක්

නත්තල් දින (25) රාත්‍රියේදී හබරණ පොලොන්නරුව ප්‍රධාන මාර්ගයේ හතේ කණුව සහ බටුඔය අතර කිලෝමීටර් 38 කණුව අසල ගිනි ගත් කැබ් රථයක් තුළ තිබී පුද්ගල මළ සිරුරක් සොයා ගෙන තිබෙනවා.

ගිනි ගත් කැබ් රථය සහ පුද්ගල මරණය

මින්නේරිය පොලිසිය සඳහන් කළේ, පොළොන්නරුව දෙස සිට හබරණ දෙසට ධාවනය වූ මෙම කැබ් රථය මෙසේ ගිනිගෙන ඇති බවයි. රථය තුළ පිටුපස ආසනයේ පුද්ගලයෙකු පිලිස්සි මියගොස් තිබූ බව පොලිසිය තහවුරු කරයි. මිය ගිය පුද්ගලයා වයස අවුරුදු 64ක් වූ ගම්පහ - දෙකටන ප්‍රදේශයේ පදිංචි ව්‍යාපාරිකයෙකු බව අනාවරණය වී තිබේ. මොහු මාර්ග සංවර්ධනයට අවශ්‍ය තාර වර්ග මෙරටට ගෙනවිත් අලෙවි කරන මහා පරිමාණ ව්‍යාපරියෙක් බවත් වැඩි දුරටත් සඳහන් වේ.

අභිරහස් කාඩ්පත් සහ දුරකථන ඇමතුම

සිද්ධියට ආසන්න මාර්ගයේ බිම අතහැර දැමූ කාඩ්පත් කිහිපයක් සොයාගෙන ඇති අතර, එමඟින් මියගිය පුද්ගලයාගේ හැඳුනුම් තහවුරු කර ගැනීමට හැකියාව ලැබී තිබේ. ඔහු මිය යාමට පෙර තම බිරිඳට දුරකථන ඇමතුමක් ලබා දී “තමා ගැන සොයා බැලීමෙන් වලකින්න” ලෙස දන්වා ඇති බවද පොලිසිය පැවසීය. 

එසේම මෙම ගිණිගත් කැබ් රථයේ පිටුපස කුඩා කම්බියකින් ගැට ගසා ඇති බවත් කම්බියේ කෙළවර මියගිය පුදගලයාගේ යැයි සැක කරන ගමන් මල්ලක්ද ගැට ගසා ඇති බව සොයාගෙන තිබෙනවා.

මරණය පිළිබඳ සැකයක් සහ පරීක්ෂණ

මෙම සිද්ධිය ඝාතනයක්ද, නොහොත් සියදිවි නසාගැනීමක්ද යන්න පිළිබඳව පරීක්ෂණ ක්‍රියාත්මකයි. මියගිය පුද්ගලයාගේ සහ ඔහුගේ පුත්‍රයාගේ DNA පරීක්ෂණ සඳහා නියෝග ලබා දී ඇති අතර, රජයේ රස පරීක්ෂක වාර්තාවක්ද ලබා ගැනීමට කටයුතු කර ඇත.

පවුලේ සාක්ෂි සහ පරීක්ෂණ තත්ත්වය

මියගිය පුද්ගලයාගේ පවුලේ සාමාජිකයන් පවසන්නේ, ඔහු මින්නේරිය ප්‍රදේශයට ගොස් ඇති බව ඔවුන් නොදන්නා බවයි. කෙසේ වෙතත්, මෙම කැබ් රථය සහ රථයෙන් සොයාගත් භාණ්ඩ මියගිය පුද්ගලයාගේ බව ඔවුන් තහවුරු කර තිබේ.

මෙම සිදුවීමට පෙර මෙම පුද්ගලයා තම පුත්‍රයා සමඟ බහින් බස් වීමක්ද සිදුව ඇති බව පැවසෙනවා.

#Crime #SriLanka #News